شد ولادك


خلى بالك وشد ولادك

"إبنى عصبى جداً"  "إبنى بيتهته فى الكلام" "إبنى دمعته قريبة وبيعيط على أى حاجة"
كلها عبارات بنسمعها وبتتكرر فى كتير من بيوتنا والبيوت دى هى غالباً اللى برضة بنسمع فيها شكاوى من نوعية "ابنى متعلق بالكرتون بشكل غير عادى"، "ابنى طول النهار لازق عينه يا إما فى التلفزيون يا إما التاب او الموبايل".
مش كتير مننا قدر يربط ما بين الأعراض اللى اتذكرت فى الأول زى (العصبية - البكاء السريع و التهتهة) بالإضافة لحاجات تانية كتير زى (عدم المشاركة - الكسل - عدم التركيز وطبعاً الأنانية) وما بين السبب فى ده وهو بأختصار قضائهم وقت طويييل جداً مع التلفزيون والكرتون والألعاب اللى ع الموبايل والتاب وخلافه، واللى نقدر نسميها كدة (الأنغماس فى العالم التيكنولوجى) واللى لو كنا عايزين نبقى صريحيين مع نفسنا هنقول إن السبب فى دا كله كلمة واحدة يا ريت تخلوا بالكوا منها جداً السبب هو ((إحنا)) .. وعلى رأى عمر دياب "نقولها تااااانى" السبب فى الحالة العامة دى (إحناااااااااا) بعلو الصوت أهوه.
ببساطة كدة إحنا اللى عاملين فى ولادنا كدة .. إحنا اللى هربنا منهم ومن (زنّهم) على حد تعبير الكتير مننا وبقينا نبعته بإيدينا لأمهم البديلة اللى هى تيكنولوجيا الألعاب وأبوهم البديل اللى هو الكرتون.
أصلا الكرتون بتاع اليومين دول لوحده مصيبة وإن شاء الله لازم اتكلم عنه فى بوست تانى.
أى أم دلوقتى مبقتش مستحملة طفلها يقف جنبها فى المطبخ يتكلم معاها أو يناقشها أو حتى يطلب منها حاجة والصراحة يعنى الست الله يكون فى عونها هى يعنى هاتعمل إيه ولا إيه، هتطبخ ولا تشطف المواعين ولا تشوف الغسالة الفول اتوماتيك اللى مبتفصلش وعماله تاكل فى الشرابات وبس ولا ترد على ابنها ولا بنتها الزنانة دى. مش كفاية إنها مش ملاحقه ع الرسايل اللى نازله ترف عليها من الخماشر جروب اللى عندها عالوتساب (جروب المدرسة - جروب العائلة - جروب الشغل - جروب شلة النم على خلق الله - الجروب اللى اتعمل عشان نبارك لهايدي على خطوبتها وطبعاً الجروب اللى من غير هايدي عشان ننم على يوم الخطوبة واللى حصل فيها) يبقى بصراحة كدة أختر الإجابة الصحيحة مما بين القوسين 
أيهما أهم وأولىُ (الوات ساب - الواد ابنك الزنان)؟
لو عايز تحلها ... الحل فى منتهى البساطة وقولته فى البوست اللى فات ممكن ترجعله 
ولا قولك بلاش أنت اصلا مش عارف أو مش عايز ترجع لأبنك يبقى هترجع للبوست بتاعى
هاقولك هنا تانى وأمرى إلى الله وكفاية أنك اصلا انك صابر وبتقرالى لحد دلوقتى. 
إسمع يا سيدي #الوصايا_العشر بعنوان (علشان خاطر ولادنا)


1- بصوا لازم تعرفوا ان الموضوع صعب فى أوله بس ولادكوا يستاهلوا تتعبوا عشانهم.


2- قبل ما تشد ولادك ناحيتك شد انت نفسك ناحية ولادك الأول، نادى عليهم وأقعد أتكلم معاهم فى أى حاجة، بس بشرط يكون التفزيون مقفول. 


3- متستغربس لو لقيت نفسك بتهته ومش عارف تفتح معاهم اى موضوع وأنت اللى فى شغلك برنس ومدورها وتعرف تكلم عشرة فى وقت واحد (دا عشان متعودتش تتكلم معاهم وكل المواضيع اللى فى دماغك (+18)  قصدى (+35)، فمش عايزك تتوتر خالص وهتحس بتحسن بالتدريج زى أى اتنين مخطوبين فى الأول بيفضلوا يبصوا لبعض والكلام بالقطارة وبعد كدة محدش بيعرف يسكتهم)


4- الموضوع صعب فى أوله بس ولادكوا يستاهلوا تتعبوا عشانهم.


5- متتعصبش لو لقيت ولادك مش مندمجين معاك فى الأول ودا غالباً لسبب من اتنين: 
الأول لأنهم مش هايبقوا مصدقينك وهيشوفوا أدائك (فيك قوى) ساعتها متتكسفش من نفسك وأثبتلهم أنك صادق معاهم بضحكتك فى وشهم وبعدم استيائك لسماعهم لما يتكلموا.
السبب الثانى أنهم حتى لو صدقوا أدائك هتلاقيهم باصينلك ومزبهلين جداً وكأن فى فيلم جديد بيتعرض على وشك، إياااااك تقلق خالص، هما دلوقتى بيحاولوا يتأكدوا انك أنت أبوهم فعلاً.


6- الموضوع صعب فى أوله بس ولادكوا يستاهلوا تتعبوا عشانهم.


7- يا ست الكل لازم تعدلى الأريال بتاعك ناحية ولادك عشان صورتهم تظهر واضحة قدام عنيكي ( يعنى لما تلاقى الزن من الواتس وكمان من ولادك فى نفس الوقت) الطبيعي إنك ترمى الواتس عشان ولادك مش ترمى ولادك عشان الواتس. (ملحوظة: اللى فاتك ع الواتس بيتسجل وتقدرى ترجعى تقريه وتردى عليه واللى فات من ولادك صدقينى مابيرجعش)   


8- وجود بنتك جنبك فى المطبخ فرصة عشان تعيش الجو ده من صغرها وتتعلم الطبخ بالتدريج بدل ما تذل جوزها فى أول الجواز وتحرق المطبخ مرتين على ما تتعلم زى ما حضرتك عملتى فى جوزك.


9- وجود أبنك جنبك فى المطبخ برضه ليه فايدة رائعة دلوقتى (شوفى الشيف الشربيني وابنه بياخدوا كام فى الحلقة).


10- زى ما قولت فى البوست اللى فات بـ 2 جنية ونص من على أول الشارع تقدروا تشتروا قصة أطفال تتحكى فى 10 دقايق للولاد قبل ما يناموا وهتحسوا الفرق فى عيونهم.


11- #الحضن دواء لحاجات كتير قوى وحماية من مشاكل اكتر فى زمننا المهبب ده، وعشان هو دواء أحضنوا ولادكوا قوى 3 مرات فى اليوم (قبل المدرسة - أول ما يرجعوا م المدرسة - قبل النوم) وهتعرفوا ساعتها قد إيه إنتوا اللى كنتوا محتاجين الحضن ده أكتر منهم.
(ملحوظة: أحضنوا ولادكوا أحسن ما يدوبوا فى حضن تانى برة وأنتوا فاهمنى)


12- أخيراً لازم أأكد ← سواء لقيت الموضوع صعب ولا سهل فبرضه ولادكوا يستاهلوا تتعبوا عشانهم شوية.


فى النهاية تحية منى لكل واحد سخيف هايسيب كل اللى انا قولته ده ويقولى أنت قولت الوصايا العشر ودول 12 .. هقولك عارف والله يا فكيك عصرك وأوانك بس هى لازم تتقال كدة عشرة أو سبعة.
*لو حاسس المقالة مفيدة ممكن تعملها شير وتكسبنى ثواب معاك

جيل الثمانينات

جيل الثمانينات

جيل الولاحاجة اللى عاش كل حاجة

بقلم: أحمد الحداد


جيلنا #جيل_الثمانينات هو الجيل اللى قضى طفولته فى عصر #الولاحاجة وعاش شبابه ورشده فى عصر #الكل_حاجة.

مفيش حد مبيعترفش إن الفترة الأولى من حياتنا فى فترة الولاحاجة هى الفترة الأهم والأمتع والأسعد فى حياتنا بالرغم من عدم وجود وسائل الترفيه المتعددة اللى موجودة فى عالمنا دلوقتي .

- برغم زيارتنا المتعددة لكتير من المولات وأشهر الكافيهات بس كنا بنستمتع بإزازة الحاجة الساقعة وباكوا بسكوت بوريو ولا بيمبو عند الكشك اللى على ناصية الشارع اكتر من دلوقتى 100 مرة.
بسكويت بيمبو بتاع زمان

- برغم مئات المركات العالمية للملابس واللى بتطرح جديد كل يوم إلا إنه يفضل لبس العيد وريحته اجمل لبس فرحنا بيه.

- مهما هاتتبسط فى لمة البلاي ستيشن مش هاتيجي حاجة جنب لمة العيلة زمان وإحنا بنمص قصب فى البيت ولا بنشوى ذرة فى الغيط بتاع قرايبنا اللى فى البلد.

- مهما هتستمتع بطعم الشاى الدلما ولا أحمد تى مش هيكون أطعم من الشاى اللى اتعمل على الراكية فى الغيط.

- برغم وجود العديد من الملاهى اللى مليانه بألعاب تبهر للكبير والصغير زى دريم بارك مثلاً دا غير الملاهى المغلقة اللى فى المولات .. بس برضه مش هتلاقيها ممتعة زى المراجيح والدويخة والساقية بتوع المولد.
الساقية أو الزقازيق
مراجيح المولد والشقلبة

- مهما كانت نظافة أوبر وكريم مش هتبقى بنفس متعتك فى الكارتّة أو الحنطور ويا سلام بقى لو قعدت جنب السواق ومسكت اللجام بتاع الحصان .

- ظاهرة الملاعب الجديدة هايلة بس تيجي إيه جنب ذكرياتنا "فى لعب الكورة فى الشارع فى حتتنا" على رأى محمد فؤاد.
زينة رمضان

- مهما عملت الشركات من دعاية مختلفة فى الشوارع تيجي إيه جنب الزينة الورق والفوانيس اللى كنا بنسهر نحضرلها ونغطى بيها شوارعنا طول شهر رمضان.

- كل يوم اعلان عن لعبة جديدة فى (توى ار اص) وهابى ميل ماكدونالد وغيرها ومش هتلاقى ولادك بيستمتعوا بيهم غير مدة صغيرة جدا واحنا اللى قعدنا سنين مستمتعين بالطيارة الورق.


#الخلاصة

كلمة إنبساط جاية من البساطة
كل لما تحب تبقى مبسوط دور على البساطة، أقولك على فكرة  جرب تجيب عودين قصب وتفرش حاجة فى الصالة وتقعد انت ومراتك وعيالك واتكلموا مع بعض وانتوا بتاكلوه، ولا خدهم وروح اى جنينة قريبة اقعدوا أجروا شوية واتشقلبوا وهتشوف ضحكة من ولادك عمرك ماشوفتها.

وانت راجع من الشغل اشترى من بتاع الجرانين اللى ع الناصية قصة أطفال ب 3 جنية وخد من وقتك كل يوم عشر دقايق بس واقعد احكيهالهم وشوف نظرة انبهار جديدة فى عيونهم بمليون جنية.

إسعد نفسك بأولادك وإسعد أولادك بيك قبل ما العمر يخلص ومايفتكروش ولو حتى ابتسامه من قلوبهم فى حضنك.

#البساطة_كنز_لايفنى
#البساطة_هى_الحل
#جيل_الولاحاجة
#أحمدالحداد 

كلمات جديدة لكل الأبراج بعد أغنية برج الحوت

بعد أغنية ( برج الحوت ) للفنان عمرو دياب

 

الشاعر أحمد الحداد يهدى جمهور الهضبة كلمات جديدة لكل الأبراج



بعد الجدل الذى أثير فى الفترة الماضية بعد صدور الألبوم الأخير للهضبة عمرو دياب ( معدى الناس ) وخاصة أغنية برج الحوت والتى طالب بعدها العديد من الجماهير والفنانين بكلمات أخرى لباقى الأبراج، قرر الشاعر أحمد الحداد بإهداء كل المهتمين والعاشقين للهضبة عمرو دياب كفرات خاصة من تصميمه وتأليفه تحتوى كل منها على كلمات جديدة خاصة بكل برج من الأبراج.
يتمنى الشاعر أحمد الحداد أن تنال تلك الصور والكلمات إعجاب جمهور الهضبة وإرضاء أزواقهم.

برج الحمل

برج الحمل

2- برج الثور

برج الثور

3- برج الجوزاء

برج الجوزاء


4- برج السرطان

برج السرطان


5- برج الأسد

برج الأسد


6- برج العذراء

برج العذراء


7- برج الميزان

برج الميزان


8- برج العقرب

برج العقرب


9- برج القوس

برج القوس

10- برج الجدي

برج الجدى


11- برج الدلو

برج الدلو

12- برج الحوت

برج الحوت

حكايتى مع جوميا (الخازوق الثانى)

أهلاً بيكو فى الحلقة التانية والخازوق الثانى فى رحلتى وحكايتى مع موقع جوميا


التسويق الاليكترونى, المبيعات, جوميا, موبايلات
إضافة تسمية توضيحية


حكايتى مع جوميا
(الخازوق الثانى)
أزيكم مرة تانية .. نسيت أقولكم فى المرة اللى فاتت إن الأوردر اللى كلمتكم عنه اتعمل يوم 30/7 وعشان المشكلة اللى حكتهالكم اصبح الأوردر مقيد (سيستمياً) يوم 31/7، كمان نسيت اقولكم إنى اخترت أروح استلم الأوردر بتاعى من احد الفروع اللى هما مخصصينها عشان الموضوع ده وكاتبين ان ممكن ادفع هناك كاش وفيزا وعملت الاوردر على الأساس ده بس موظف الكول سنتر اللى كلمنى قالى لا مش هينفع إنك تعمل كدة بالرغم من إن موظف خدمة العملاء اللى فى مكان التسليم أكدلى بعد كدة وانا بستلم حاجتى إن الخدمة دى موجوده عنده ومفعله من فترة كبيرة (كأنهم بيطفشوا الزباين).
فلاش باك ... يلا نرجع تانى نكمل ... اتفقت مع موظف خدمة عملاء جوميا إنى هاعيد عمل الأوردر بعد ما يوصلنى كوبون الخصم ودا فى خلال يومين بحد أقصى ولكن دا محصلش خالص والكوبون موصلش ومفيش حاجة رجعت، الحقيقة رجعت فى مباحثات تانى مع ظهور موبيلات تانية جديدة فى السوق عشان أستقر إن كنت هشترى نفس الموبايل ولا اغير رأيي بحاجة تانية جديدة، عدت شوية ايام ويوم 12 أغسطس يعنى بعد ما يقرب من اسبوعين لقيت موبايلى بيضرب واللى بيكلمنى إحدى موظفات الكول السنتر المحترمين بموقع جوميا والحوار كالتالى:
- سلامو عليكوا ... استاذ أحمد ؟ 
= أيوة يا فندم .. مين معايا؟!!
- أنا ............. من موقع جوميا.
= أهلا وسهلا .. اتفضلى ، خير؟
- يا ترى وصل لحضرتك الأوردر رقم $%^&^$# ؟
= اوردر إيه انا معملتش أوردرات .. حتى تعالى فتشيني!!😌
- إزاى يا فندم .. انا قدامى ان حضرتك عملت اوردر يوم 31/7 بموبايل وجراب ولعبة أطفال.
= اااااه انتوا لسه فاكرينه ، دا انا كنت عامله  وانا صغير 😅
-  طب المهم تكون مبسوط بالحاجة اللى وصلتك وتكون مناسباك وانت كبير. 😜
= يا مدام هو إيه اللى وصلنى .. الأوردر دا ملغى من 10 أيام واتبعتلى رسالة من حضراتكم بتأكد الكلام ده، تحبى ابعتهالك.
- فعلاً؟ 😲
= فعلاً .. كمان كوبون الخصم اللى قولتوا هاتبعتوه مجاش.😕
- ايه دا فعلاً؟ 😲
= يادى النيلة يا ستى أنتى جاية تندهشى هنا ،، وحياااااااة قلبى وأفراحه فعلاً.
- طب تمام .. اعمل اوردر جديد بقا :D 
= طب والكوبون؟ 
- هنبعتهولك فى خلال يومين
= تانى .. هتقوليلي خلال يومين تانى.😠
- احنا متأسفين جداً يا فندم ويا رب تكون الخدمة عجبت حضرتك.
= خدمة إيه يا .... توت توت توت
أنتهى الحوار والموضوع خلص هنا؟!! ،،، أبداً برضة ، الموضوع لسه كبير والمفاجآت لا تنتهى والكوميديا فى الحلقات القادمة أفظع وأكبر واوعدك سوف تندهش كما لم يحدث من قبل.
#شير وتابعنى وأندهش مع تجربتى و#حكايتى_مع_جوميا

فيسبوكي